தம்பிக்கு...

பொல்லாத உலகமடா தம்பி – அதில்

போராட வேண்டுமடா தம்பி

பொய்யெங்கும் நிறைந்ததடா தம்பி – இங்கு

மெய்வாழ வழியில்லை தம்பி

வாய்மையே வெல்லும் தம்பி – இருந்தும்

வாய்ப்பேச்சை நெறிசெய் தம்பி

ஒழுக்கத்தை பேணடா தம்பி – அதை

வழக்கமென் றாக்கடா தம்பி

மொழிகாக்க வேண்டும் தம்பி – அதுவே

பண்பாட்டின் அடையாளம் தம்பி

காதல் செய்யடா தம்பி – அங்கு

தமிழர் கலைவளர்ப்பாய் தம்பி

மானம் போற்றடா தம்பி – எங்கும்

தமிழ்வீரம் முரசறை தம்பி

புலிவீரம் நினைவுகொள் தம்பி – அங்கே

தியாகச் சுடரானார் தம்பி

அறம்நீ மறவா தம்பி – எனினும்

வாழ்விற்கு பொருள்சேர் தம்பி

புகழ்வாய் நீயும் பொதுஉடைமை – எதிர்

அழியுமிங்கு பலகொடுமை தம்பி

கசடற கற்பாய் தம்பி – என்றும்

கள் உண்ணாதே தம்பி

அறிவியல் விரிவுசெய் தம்பி – அதனை

ஆய்ந்துசொல் பிறர்க்கும் தம்பி

பெண்ணியம் போற்றடா தம்பி – இனி

அவள் ஆளவேண்டும் தம்பி

களம்நேர் காணடா தம்பி – உன்

இலக்கு வெற்றிதான் தம்பி

வீண்செயல் விட்டொழி தம்பி – பின்

வீழ்ச்சி உனக்கில்லை தம்பி

தம்பி! தம்பி! கவலைமறந்தார் – இன்று

அறிஞரெல்லாம் உன்னை நம்பி!